Lögreglan í París hefur handtekið fimm einstaklinga sem eru taldir tengjast árás starfsmanns lögreglunnar á vinnufélaga sína fyrr í mánuðinum. Árásarmaðurinn stakk fjóra til bana í höfuðstöðvum lögreglunnar í París.
Árásarmaðurinn, Mickael Harpon, 45 ára tölvunarfræðingur, hafði snúist til íslam fyrir tíu árum og hafði verið í samskiptum við félagsskap salafista, sem er róttæk hreyfing múslima.
Árásin er rannsökuð sem hryðjuverk. Harpon starfaði hjá lögreglunni frá 2003 og var sérfræðingur í upplýsingatækni.
Christophe Castaner, innanríkisráðherra Frakklands, viðurkennir að eftirlitið brást og lofar að eftirlit með öllum atvikum sem teljast óeðlileg verði aukið.
Castaner hefur verið gagnrýndur fyrir að segja að aldrei hafi verið tilefni til að gruna Harpon um eitthvað misjafnt. Síðar kom í ljós að Harpon hafði réttlætt árásina á ritstjórnarskrifstofur franska blaðsins Charlie Hedbo árið 2015. Það var ekki tilkynnt og heldur ekki breytingar þegar Harpon breytti hegðun sinni, framkomu og klæðaburði nýverið.