Justin Trudeau, forsætisráðherra Kanada, og flokkur hans, Frjálslyndi flokkurinn, hrósuðu sigri í kanadísku þingkosningunum sem fram fóru í gær. Sigurinn er þó súrsætur þar sem flokkurinn tapar fylgi en fær samt sem áður flesta þingmenn.
Góðu fréttirnar fyrir Trudeau eru þær að hann er enn við völd. Frjálslyndi flokkurinn hlaut 157 þingmenn en Íhaldsflokkurinn, undir stjórn Andrew Scheer, hlaut 121 þingmann. Samtals sitja 338 þingmenn á kanadíska þinginu og þarf því 170 þingmenn að lágmarki til þess að mynda meirihluta. Ljóst er að flokkurinn mun mynda minnihlutastjórn með stuðningi eins eða fleiri flokka.
Skilaboð Trudeau til kjósenda eru skýr ef marka má Twittter: Hann ætlar að halda ótrauður áfram.
Slæmu fréttirnar eru hins vegar þær að stjarna Trudeau sem stjórnmálamanns virðist ekki skína jafn skært og áður þó hann njóti enn töluverðra vinsælda meðal kanadískra kjósenda. Trudeau vann stórsigur fyrir fjórum árum þegar Frjálslyndi flokkurinn hlaut meirihluta á kanadíska þinginu en ýmis hneykslismál sem hafa komið upp á nýliðnu kjörtímabili hafa sett svip á stjórnartíð hans.
Þar má helst nefna umdeilt fjölskyldufrí til Indlands, SNC-Lavalin-málið svonefnda þar sem Trudeau braut siðareglur og síðast en ekki síst myndir sem birtust af Trudeau í haust þar sem hann skartaði dökkbrúnum andlitsfarða, svokölluðu „brownface“ á gala-balli á vegum einkaskóla sem hann fór á fyrir nærri tveimur áratugum.
Fleiri slæmar fréttir fyrir Trudeau og Frjálslynda flokkinn eru þær að flokkurinn tapaði fylgi í vesturhluta landsins, þ.e. Alberta og Saskatchewan þar sem Íhaldsflokkurinn jók fylgi sitt.
Í ræðu sinni til stuðningsmanna var Trudeau kokhraustur og sagði hann íbúa hvaðanæva að landinu hafnað sundrungu og neikvæðni en kosið með framsækinni stefnu og umfangsmiklum aðgerðum í loftslagsmálum.