Bandaríkjamaðurinn og fyrrverandi sjóliðinn Paul Whelan, sem var handtekinn í Moskvu fyrir tíu mánuðum og sakaður um njósnir, segir að hann eigi meira sameiginlegt með barnalega ærslabelgnum Mr. Bean frekar en viðmótsþýða einkaspæjara hennar hátignar, James Bond.
Whelan hefur setið í varðhaldi í Rússlandi grunaður um njósnir og var í morgun úrskurðaður í tveggja mánaða áframhaldandi gæsluvarðhald. Rússnesk yfirvöld segja hanna hafa verið gripinn glóðvolgan með ríkisleyndarmál á USB-drifi.
Þegar dómari las úrskurðinn í dómsal í morgun neitaði Whelan að hafa hljóð og las upp yfirlýsingu úr fangaklefanum sem komið var fyrir í dómsalnum. „Rússar segjast hafa handsamað James Bond í njósnaleiðangri. Hið rétta er að þeir numu Mr. Bean á brott úr fríi,“ sagði Whelan meðal annars og vísaði þannig í tvo af þekktustu hetjum Bretlands, þó ólíkar séu.
Whelan var handtekinn þar sem hann sótti brúðkaup hjá bandarískum vini sínum og rússneskri eiginkonu hans í Moskvu 28. desember á síðasta ári.
Samkvæmt frétt AFP er hann sakaður um að geyma ríkisleyndarmál. Hann hafi verið handtekinn með USB-drif í fórum sínum og á því hafi fundist nafnalisti. Whelan fullyrðir að vinur hans hafi komið USB-drifinu fyrir. Verði Whelan fundinn sekur bíður hans allt að 20 ára fangelsisvist.
Whelan, sem er einnig með kanadískan, írskan og breskan ríkisborgararétt, sagði við fréttamann AFP í Moskvu að hann teldi sig vera notaðan sem skiptimynt til að fá rússneska fanga sem eru í haldi vestanhafs heim. Hann sagði auk þess að málsmeðferðin gegn sér væri ekki eðlileg.