Erlent | AFP | 26.10.2019 | 7:18 | Uppfært 8:02

Þingið fær óritskoðaða skýrsluna

Sérstakur saksóknari Robert Mueller. AFP

Alríkisdómari í Washington komst að þeirri niðurstöðu í dag að bandaríska dómsmálaráðuneytinu sé skylt að afhenta þinginu óritskoðað afrit af rannsóknarskýrslu Roberts Muellers, sérstakstaks saksóknara.

Dómarinn, Beryl Howell, gaf ráðuneytinu frest fram á miðvikudag til að afhenda skýrslu Muellers um Rússarannsóknina. Hlutar hennar voru afmáðir þegar hún var birt fyrr á árinu. Howell sagði að þar væri mögulega að finna upplýsingar varðandi rannsóknir þingnefnda á meintum embættisbrotum Donald Trump forseta.

Demókratar hafa krafist þess frá því að skýrslan var gerð opinber í apríl að þeir fengju aðgang að henni óritskoðaðri. Jerry Nadler, fulltrúadeildarþingmaður demókrata, hefur meðal annars sagt að yfirstrikaðar upplýsingar í skýrslunni virðist þýðingarmiklar.

Frétt af mbl.is

Vilja skýrsluna óritskoðaða

Samkvæmt erlendum fréttamiðlum er úrskurður alríkisdómarans frá því í gærkvöld til skoðunar hjá dómsmálaráðuneytinu.

Trump hefur gagnrýnt Mueller síðan rannsókn hans hófst og kallaði skýrsluna meðal annars „nornaveiðar“ en rannsóknin sneri í upphafi að afskiptum Rússa af forsetakosningum í Bandaríkjunum fyrir þremur árum.