Aðildarríki Evrópusambandsins samþykktu í morgun að fresta útgöngu Bretlands úr sambandinu um þrjá mánuði, til 31. janúar. Áður stóð til að Bretar myndu yfirgefa ESB 31. október.
Donald Tusk, forseti leiðtogaráðs Evrópusambandsins, staðfesti þetta í færslu á Twitter.
Þar segir enn fremur að það þýði þó ekki að Bretar muni ganga úr sambandinu þann dag, heldur sé möguleiki á því að það gerist fyrr ef breska þingið samþykkir útgöngusamning.
Boris Johnson, forsætisráðherra Bretlands, mun leggja það fram á þingi í dag að boðað verði til þingkosninga 12. desember. Hann hefur hvatt þingmenn Verkamannaflokksins til að styðja sig, við litlar undirtektir.