Farage vill stofna útgöngubandalag

Nigel Farage.
Nigel Farage. AFP

Nigel Farage, evrópuþingmaður og stofnandi Brexit-flokksins, hefur kallað eftir því að Boris Johnson, forsætisráðherra Breta, gefist upp á að reyna að fá útgöngusamning sinn við Evrópusambandið samþykktan, og gangi þess í stað í „útgöngubandalag“ með Brexit-flokknum. Samstarf Brexit-flokks og Íhaldsflokks væri „eina leiðin fram“. Tekur hann hér undir hugmyndir Donalds Trump Bandaríkjaforseta, sem sagði í viðtali við Farage á dögunum að bandalag Farage og Johnson yrði „óstöðvandi“.

Farage hefur hótað því að verði ekki af samkomulagi muni flokkur hans bjóða fram mann í „hverju einasta kjördæmi“ í Englandi, Skotlandi og Wales. Það gæti komið Íhaldsflokknum illa enda er Brexit-flokkurinn vís til að laða til sín kjósendur sem ella kysu Íhaldsflokkinn. Íhaldsmenn hafa þó ítrekað tekið fyrir að formlegt bandalag verði myndað við Brexit-flokkinn.

Nýjustu kannanir sýna Íhaldsflokkinn með töluvert forskot á Verkamannaflokkinn, en sumir íhaldsmenn óttast að framganga Brexit-flokksins verði til þess að tvístra útgöngusinnuðum kjósendum og hjálpa Verkamannaflokknum að ná til sín þingsætum.

Á hinum vængnum hafa flokkar hliðhollir áframhaldandi aðild að Evrópusambandinu, Frjálslyndir demókratar, græningjar og velski þjóðernisflokkurinn, átt í viðræðum um sameiginleg framboð, en í samtali við BBC segir Jonathan Bartley, einn leiðtoga græningja, að viðræðurnar séu „ekkert leyndarmál“. Ekkert hafi þó verið ákveðið enn, fyrir kosningarnar sem fara fram 12. desember.

mbl.is