Donald Trump Bandaríkjaforseti hefur flutt lögheimili sitt frá Trump-turninum í New York og til Flórída. Hann segist hafa sætt slæmri framkomu stjórnmálaleiðtoga í New York, þrátt fyrir að hafa borgað þar milljónir dollara í skatta og gjöld.
New York Times fjallaði um málið í gær og sagði forsetann hafa flutt lögheimili sitt að Mar-a-Lago setri sínu á Palm Beach í Florída í septembermánuði. Trump staðfesti þetta skömmu síðar, á Twitter.
Þar sagðist hann ætla að búa í Hvíta húsinu, vonandi í fimm ár til viðbótar, en síðan myndi fjölskyldan setjast að í Flórída. Ástæðan sem hann gefur upp er helst sú að bæði borgarstjórar og ríkisstjórar í New York hafi komið illa fram við hann og segir Trump að fáir hafi fengið verri meðferð af þeirra hálfu.
Trump er fæddur og uppalinn í New York og segir hann að þrátt fyrir að nú sé hann að fara að flytja muni borgin ávallt verða honum hjartfólgin.
Stjórnmálamennirnir sem Trump sakar um illgirni í sinn garð, ríkisstjórinn Andrew Cuomo og borgarstjórinn Bill de Blasio, hafa báðir tjáð sig um málið.
„Ekki láta hurðina skellast á þig á leiðinni út eða eitthvað,“ skrifaði borgarstjórinn á Twitter.
Ríkisstjórinn Cuomo sagði að farið hefði fé betra og sakaði forsetann einnig um að hafa svikist undan skattgreiðslum í New York-ríki.
„Það er ekki eins og Trump hafi borgað skatta hérna hvort sem er,“ skrifaði Cuomo á Twitter-síðu sína.
Trump hefur ekki verið mikið fyrir að ræða sín persónulegu skattamál og aldrei gert skattskýrslur sínar opinberar þrátt fyrir áralöng áköll andstæðinga hans á stjórnmálasviðinu þar um.
Hvað sem því líður er ljóst að með flutningi til Flórída mun forsetinn búa við hagfelldara skattaumhverfi, en samkvæmt ónafngreindum heimildarmanni sem vitnað er til í frétt New York Times er skattalegt hagræði aðalástæðan fyrir flutningunum.
Flórída-ríki leggur hvorki á tekjuskatt né erfðaskatt og hefur löngum verið áfangastaður fyrir ríkt fólk af austurströnd Bandaríkjanna sem vill síður greiða þá skatta sem ríkin þar leggja á.