Guðni Th. Jóhannesson forseti Íslands missti af falli Berlínarmúrsíns á þessum degi fyrir 30 árum, þar sem hann var of samviskusamur nemandi. Frá þessu greindi Guðni í frétt Ríkisútvarpsins um þennan heimssögulega viðburð í kvöld.
Guðni var á þessum tíma 21 árs og í sagnfræði- og stjórnmálafræðinámi við Warwick-háskóla í Bretlandi.
„Svo gerðist það þarna í byrjun nóvember að félagi minn í náminu sagði: „Nú er allt að gerast, nú er fólkið að flýja frá Austur-Þýskalandi um Tékkóslóvakíu, sem þá var, og vestur yfir. Við skulum skella okkur yfir, Guðni, við skulum fara til Berlínar og anda þessu andrúmslofti að okkur, verða vitni að sögunni í mótun.““
Það fór þó ekki svo að Guðni færi með.
„Ég hugsaði mig aðeins um, og komst svo að því að ég hefði bara ekki tök á að fara, því ég yrði að skila ritgerð í samanburðarfræðum kommúnisma og þessi samviskusemi olli því að ég missti af þvi að verða vitni að falli Berlínarmúrsins,“ sagði forsetinn.
Blaðamaður mbl.is, bús. í Berlín, tók íslenskt Berlínarfólk tali í tilefni af þessum tímamótum og fékk þau til að rifja upp þessa stóru stund. Þá umfjöllun má lesa með því að fylgja hlekknum hér að ofan.