Erlent | mbl | 10.11.2019 | 19:32 | Uppfært 21:19

Íhugar kæru vegna nauðgunarásökunar

Leikstjórinn hefur verið sakaður um að brjóta á fjölda kvenna. Á einni viku var hann ásakaður um að nauðga bæði átján og tólf ára gömlum stúlkum. AFP

Fransk- pólski kvikmyndaleikstjórinn Roman Polanski hyggst sækja franskt dagblað sem birti nauðgunarásökun á hendur honum til saka. Í blaðinu, Parisien, er Polanski ásakaður um að hafa nauðgað fyrrverandi leikkonu á áttunda áratugnum. Hún var þá átján ára gömul.

Polanski hefur áður verið sakaður um nokkur önnur kynferðisbrot og verið dæmdur fyrir að nauðga þrettán ára stúlku árið 1977.

Frétt af mbl.is

Berbrjósta mótmæltu þær Polanski

Í fréttinni sem birtist í Parisien á föstudag segir Valentine Monnier, ljósmyndari og fyrrverandi leikona, frá því þegar Polanski réðst á hana og nauðgaði henni við smáhýsi hans á svissneska skíðasvæðinu Gstaad árið 1975. Þá var Monnier átján ára gömul.

„Ég hélt að ég myndi deyja“

Hún segir að Polanski hafi reynt að láta hana kyngja pillu á meðan árásinni stóð og síðar meir baðst hann afsökunar með tárin í augunum og grátbað Monnier um að lofa sér að segja engum frá því sem gerðist.

Frétt af mbl.is

Þriðja konan ásakar Roman Polanski

„Ég hélt að ég myndi deyja,“ sagði Monnier í opnu bréfi sem birt var í Parisien ásamt viðtali við hana. Blaðið hafði samband við vitni sem staðfestu frásögn Monnier.

Hún er fyrsta franska konan sem sakar Monnier um kynferðisofbeldi en kvikmynd hans J'accuse, eða upp á íslensku „Ég ásaka“, kemur út á miðvikudag.

„Herra Polanski mótmælir þessari nauðgunarásökun harðlega,“ sagði Herve Temime, lögmaður Polanskis, í yfirlýsingu.

„Við erum að vinna að málshöfðun gegn útgáfunni,“ bætti Temime við.