Ný kosningaauglýsing breska Íhaldsflokksins hefur vakið mikla athygli, en þar endurleikur Boris Johnson forsætisráðherra frægt atriði úr jólamyndinni Love Actually frá 2003.

Í kvikmyndinni sjálfri snýst atriðið um mann, Mark að nafni, sem kemur skömmu fyrir jól og tjáir dulda ást sína á Juliet, eiginkonu besta vinar síns, með rómantískum skiltum „af því að um jólin segir maður sannleikann“.

Í auglýsingu Íhaldsflokksins er þetta atriðið endurtekið, en í stað þess að Boris sé mættur til þess að tjá ást sína á konunni sem kemur til dyra er hann í atkvæðaleit. Boðskapurinn er sá að ef Íhaldsmenn fái ekki meirihluta muni ekkert breytast í breskum stjórnmálum, áfram verði rifist um útgöngu Bretlands úr Evrópusambandinu næstu árin.

Auglýsingin er fagmannlega gerð, þykir nokkuð sniðug og hefur sem áður segir vakið mikla athygli í Bretlandi frá því hún birtist í gærkvöldi. Hugh Grant, sem einmitt leikur forsætisráðherra Bretlands í einu aðalhlutverkanna í Love Actually, tjáði sig um málið í útvarpsþætti á BBC í morgun.

Grant, sem er andvígur útgöngu Bretlands úr ESB og hvetur fólk til þess að kjósa taktískt gegn frambjóðendum Íhaldsflokksins í kosningunum á fimmtudaginn, segist hafa tekið eftir því að eitt þeirra skilta úr upphaflegu myndinni sem Boris hafi ekki haldið á lofti í auglýsingunni hafi verið það um að sannleikann ætti að segja um jólin.

„Spunameistarar Íhaldsflokksins hafa kannski hugsað sem svo að það væri spjald sem liti ekki sérlega vel út í höndum Boris Johnsons,“ sagði Grant.

Tengdar fréttir

Brexit

Verði auðveldara að fara til og frá Bretlandi

• Fríverslunarsamningurinn formlega genginn í gildi
• Harma hve illa Bretum hefur tekist að semja
• Fimm mál sem leiddu til fallsins
• Meiri afli vegna Brexit kalli á fjárfestingar

» Fleiri tengdar fréttir

Kosningar í Bretlandi 2019

„Róttækasta stefnuræða drottningar síðari ára“

• Drekki ekki kampavín með auðkýfingum
• Áfram afgerandi kynslóðabil í breskum stjórnmálum
• Sökuð um að kalla kjósendur heimska
• Sleppur við að synda nakin í Loch Ness

» Fleiri tengdar fréttir

• Blogga um frétt