Pervez Musharraf, fyrrverandi forseti Pakistan, hefur verið dæmdur til dauða fyrir landráð. Hann var ákærður fyrir fimm árum fyrir að setja neyðarlög í landinu árið 2007 og fella stjórnarskrá landsins úr gildi.
Musharraf er talinn hafa átt aðild að morðinu á stjórnarandstöðuleiðtoganum Benazir Bhutto. Eftir morðið á Bhutto í desember árið 2007 lýsti ríkisstjórn Musharraf ábyrgðinni á hendur leiðtoga talíbana í Pakistan, Baitullah Mehsud, en hann neitaði að hafa átt þátt í tilræðinu.
Musharraf sagði af sér sem forseti árið 2008 og var þá talið að hann hefði fallist á að segja af sér eftir að hafa náð samkomulagi við stjórn landsins fyrir milligöngu vestrænna ríkja um að hætta við málshöfðun um spillingu í starfi gegn því að hann léti af embætti.
Musharraf, sem var yfirmaður hersins, varð forseti árið 1999 en hann stýrði valdaráni hersins í Pakistan í október það ár. Hann dvelur nú í Dúbaí en hann leitaði sér læknishjálpar þar árið 2016.