Stjórnarkreppa á enda í Austurríki

Leiðtogar Þjóðarflokksins og Græningja hafa náð saman um myndun ríkisstjórnar í Austurríki. Sebastian Kurz, leiðtogi Þjóðarflokksins, tekur við embætti kanslara á nýjan leik.

Er þar með endi bundinn á stjórnarkreppu sem varað hefur frá því í maí í fyrra er stjórn Þjóðarflokksins og Frelsisflokksins hrökklaðist frá völdum eftir að Heinz-Christian Strache, formaður Frelsisflokksins, hafði gerst uppvís að þvi að bjóða fyrirtækjum hlunnindi gegn pólitískum stuðningi. Í kjölfarið var boðað til kosninga. Þar hlaut Þjóðarflokkurinn 37 prósenta fylgi, en Græningjar 14.

Frétt af mbl.is

Strache segir af sér

„Okkur hefur tekist að sameina það besta úr báðum heimum,“ sagði Kurz á nýársdag er stjórnin var kynnt. „Það er mögulegt að verja bæði loftslag og landamæri.“ Stjórnarsáttmáli hefur enn ekki verið kynntur í heild sinni, en af tali formannanna má ætla að stefnt verði að almennum skattalækkunum, í samræmi við stefnu Þjóðarflokksins, á sama tíma og ýmsir grænir skattar verða hækkaðir.

• Blogga um frétt