Erlent | mbl | 13.1.2020 | 21:53 | Uppfært 22:12

Neita því að hafa skotið á mótmælendur

Frá mótmælum nærri háskóla í Teheran á laugardaginn. AFP

Lögreglan í Teheran, höfuðborg Írans, neitar því að hafa skotið á mótmælendur í borginni í gær, en myndbönd sem birst hafa á samfélagsmiðlum sýna átök á milli lögreglu og mótmælenda og byssuhvellir virðast heyrast á þeim sumum.

Mótmælin brutust út á laugardag eftir að ríkisstjórn landsins játaði að hafa grandað flugvél frá Ukraine International Airlines fyrir mistök aðfaranótt miðvikudags í síðustu viku.

Frétt af mbl.is

„Biðjist afsökunar, segið af ykkur“

Í frétt BBC segir að fregnir hafi borist af því að fjöldi manns hafi særst þegar öryggissveitir lögreglu leystu upp mótmæli á Azadi-torgi í Teheran í gær. Byssuhvellir virðast heyrast í myndbandi sem birt er á Twitter.

#BREAKING: Video leaked now is showing brutality of #IRGC's #Basij militias in #AzadiStreet of #Tehran. They can be seen riding bikes, stabbing people & firing point blank with their guns. They break windows of cars & shops to create fear among Iranians. #IranProtests2020 #PS752 pic.twitter.com/GFOwdJv3gq
— Babak Taghvaee (@BabakTaghvaee) January 13, 2020

Annað myndband sýnir hvernig særð kona er dregin í burtu, en samkvæmt frétt BBC öskrar fólk í myndskeiðinu að hún hafi fengið byssukúlu í fótinn.

Mótmælandi sem var á staðnum segir við BBC að fyrst hafi öryggissveitir barið á mótmælendum með kylfum og síðar dregið upp byssur og skotið inn í mannfjöldann, eftir að mótmælendur byrjuðu að kyrja harðorð slagorð gegn æðstaklerki landsins, Ali Khamenei.

Security forces fire on this woman in Tehran’s Azadi Ave.

Her crime? Being furious with the regime for downing a civilian aircraft and mourning in the street for 176 Iranian-Canadians who got killed in #UkrainianPlane #IranProtests2020 pic.twitter.com/nGcFpb1hEC
— Masih Alinejad 🏳️ (@AlinejadMasih) January 12, 2020

Skammt er síðan að tíðindi bárust frá Íran um harkalegar aðgerðir stjórnvalda gegn mótmælendum, en í nóvembermánuði voru umfangsmikil mótmæli vegna verðhækkana á bensíni víða um landið.

Þeim var svarað af mikilli grimmd og hörku og telja sumir greinendur að jafnvel hafi stjórnvöld myrt yfir 1.000 manns í harkalegum aðgerðum til þess að kveða mótmælin niður, en erfitt hefur reynst að sannreyna þær fregnir.