Fyrsta smitið greinist utan Kína
Setja bókamerki
Lungnabólga af völdum nýrrar kórónaveiru hefur greinst utan Kína, í ferðalangi í Taílandi. Um var að ræða smit í kínverskri konu sem var stöðvuð á flugvellinum í Bangkok við komuna frá Wuhan.
Tugir Kínverja hafa greinst með afbrigðilega lungnabólgu í borginni Wuhan síðan í lok desember og hafa Alþjóðaheilbrigðismálastofnunin (WHO) og Sóttvarnastofnun Evrópusambandsins (ECDC) meðal annars vakið athygli á hópsýkingunni. Einn er látinn af völdum sýkingarinnar.
Allir sýktu virðast hafa smitast á matarmarkaði í Wuhan, en ekkert smit á milli manna hefur verið staðfest.
Á vef embættis landlæknis segir að svo virðist sem lungnabólgan sé orsökuð af nýrri kórónaveiru sem sé frábrugðin þeim kórónaveirum sem orsökuðu SARS (Severe acute respiratory syndrome) í Suður-Kína (og fleiri löndum) á árunum 2002-2003 og MERS (Middle East respiratory syndrome) sem greinst hafi í Mið-Austurlöndum frá 2012. Báðar þessar sýkingar hafa valdið dauða hjá mörg hundruð einstaklingum. Ekkert bóluefni er til við sýkingunni og engin veirulyf að sögn sóttvarnalæknis.
„Að svo stöddu er ekki ástæða til neinna sértækra aðgerða og ekki ástæða til ferðatakmarkana til Suður-Kína.
Einstaklingar sem koma hingað til lands frá Wuhan-borg í Kína með kvef, hósta og hita eru beðnir um að upplýsa heilbrigðisstarfsmenn um sínar ferðir. Ekki er þörf á að allir einstaklingar leiti til heilbrigðiskerfisins sem nýlega hafa verið í Kína og fá kvef eða hósta. Einungis þeir sem veikjast alvarlega eða sem áhyggjur hafa af sínum veikindum leiti til heilbrigðiskerfisins. Upplýsingum um veikindin í Kína hefur verið dreift til heilsugæslunnar og til smitsjúkdómalækna,“ segir í tilkynningu á vef landlæknis.
„Menn eru bara búnir að forgangsraða“
Færa slökkviliðið til nútímans
Ofsóttur innan veggja Boeing
Kveðst tala af virðingu: „Ég er enginn dóni“
29 nautgripir fundust dauðir