„Hafa þau aldrei séð geiminn?“
Setja bókamerki
Hinn nýstofnaði bandaríski geimher hefur kynnt nýja einkennisbúninga sína. Búningarnir eru í hefðbundnum felulitum, mógrænir og brúnir, og hafa fyrir vikið orðið skotspónn grínista á netinu sem velta fyrir sér hvernig jarðarlitirnir muni nýtast sem felulitur í geimnum. „Hafa þau aldrei séð geiminn?“ spyrja notendur á Twitter.
Talsmenn geimhersins útskýrðu þó að ástæðan fyrir búningavalinu væri einfaldlega sú að geimherinn væri að nýta eldri hönnun og spara sér þannig fé í hönnun og framleiðslu nýrra búninga. Þá myndu hermenn geimhersins líta út eins og félagar þeirra úr öðrum deildum á jörðu niðri.
Geimherinn er sjötta deild bandaríska hersins, til viðbótar við landher, flugher, landhelgisgæslu, flota og landgöngulið flotans. Hefur Donald Trump Bandaríkjaforseti sagt að deildin muni hjálpa bandaríska hernum að hindra árásir í því sem hann kallar „nýjasta umdæmi stríðs í heiminum“.
Þar með er þó ekki sagt að bandarískir „geimhermenn“ verði staðsettir í geimnum, sem skýrir búningavalið. Þess í stað mun geimherinn sjá um að verja bandarískar eignir í heiminum, svo sem hundruð gervihnatta Bandaríkjamanna á sporbaug um jörðu. Að sögn Barböru Barrett, yfirmanns flughersins, mun geimherinn hafa á að skipa 16.000 starfsmönnum, en fjárlög hans fyrir yfirstandandi ár nema um 4,5 milljörðum króna.
Þessar útskýringar drógu þó ekki þróttinn úr grínistum, sem hefðu heldur viljað hafa búninginn svartan eða í einhvers konar „geimlitum“.
Ný staða uppi og óvissan meiri
Hyggjast leyfa fólki að skoða gosið
Bjarkey stendur við skammarbréf Svandísar
Nauðgaði kærustu sinni og tók það upp
Segjast ekki vera á kaldri slóð
Sárt að horfa upp á illa meðferð fjármuna
Færa slökkviliðið til nútímans