Erlent | AFP | 26.1.2020 | 21:00 | Uppfært 21:47

Yfirvöld flytja borgara sína burt frá Kína

Mánudagsmorgunn er runninn upp í Kína og þar með hafa víðtæk ferðabönn tekið gildi vegna hraðrar útbreiðslu kórónaveirunnar. AFP

Fimm tilfelli kórónaveirunnar sem kennd er við Wuhan-borg hafa verið staðfest í Bandaríkjunum. Bandarísk yfirvöld undirbúa nú brottflutning ræðismanna sinna og annarra bandarískra ríkisborgara frá Wuhan. Verður það gert með flugferð frá Wuhan til San Francisco.

Frétt af mbl.is

Xi segir Kína geta unnið „bardagann“ við veiruna

Kórónaveiran, sem dregið hefur 56 til bana á skömmum tíma, á rætur að rekja til Wuhan í Hubei-héraði í Kína. Fjöldi sýktra nálgast 2.000 og eru þeir flestir í Hubei, en þó eru komin upp tilfelli víðar í Kína, í Asíu, Ástralíu, Bandaríkjunum og Frakklandi.

Franski bílaframleiðandinn PSA, sem rekur verksmiðju í Wuhan, hefur einnig tilkynnt að allt starfsfólk og fjölskyldur þeirra verði flutt burt frá borginni og komið fyrir í nálægu héraði á meðan faraldurinn gengur yfir.

Þá hafa japönsk yfirvöld sagst vera í samstarfi við stjórnvöld í Peking um að koma Japönum hratt og örugglega úr landi, auk þess sem yfirvöld í Suður-Kóreu kanna eftirspurn eftir brottflutningi meðal ríkisborgara sinna.

Ferðabann hefur áhrif á tugi milljóna

Mánudagsmorgunn er runninn upp í Kína og þar með hafa víðtæk ferðabönn tekið gildi vegna hraðrar útbreiðslu kórónaveirunnar.

Kínversk yfirvöld hafa gripið til víðtækra ferðatakmarkana bæði innan Kína og í tengslum við hópferðir Kínverja út fyrir landsteinana. Wuhan-veiran hefur þegar greinst utan Kína, svo sem í Ástralíu, Bandaríkjunum og Frakklandi, auk fjölda Asíulanda.

Frétt af mbl.is

Fólk smitar áður en einkenni sjást

Heilbrigðisyfirvöld í Kína eru uggandi vegna útbreiðslu veirunnar, en að þeirra sögn virðist hún smitast manna á milli með æ auðveldari hætti. Nú er til að mynda komið í ljós að sýktir einstaklingar eru byrjaðir að smita áður en nokkur einkenni eru komin fram. Enn er veiran þó ekki jafn bráðsmitandi og SARS-veiran sem dró hundruð til bana á árunum 2002 til 2003.

Í Hubei-héraði sæta tugir milljóna manna nánast algeru ferðabanni. Í Shandong-héraði og í stórborgunum Peking, Shanghai, Xi'an og Tianjin hefur langferðarútum verið meinuð inn- og útganga.