Herinn staðfestir að vélin hafi verið bandarísk

Bandaríski herinn hefur staðfest að flugvél sem brotlenti í gærmorgun í Afganistan hafi verið á hans vegum. Sonny Leggett ofursti í hernum sagði að meðan enn væri verið að rannsaka orsök slyssins væri ekkert sem benti til þess að hún hefði verið skotin niður.

Flugvélin brotlenti í austurhluta Afganistan á Dek Yak-svæðinu í Ghazni-héraðinu klukkan 13:10 að staðartíma, eða klukkan 8:40 að íslenskum tíma. Svæðið er að stórum hluta undir yfirráðum talíbana sem gerir embættismönnum erfiðara fyrir að komast þangað.

Frétt af mbl.is

Talíbanar segja þotuna sem hrapaði bandaríska

Enn er óljóst hversu margir voru um borð í vélinni.

Talíbanar birtu myndir í gær sem sýndu flugvél sem hafði hrapað og var hún merkt Bandaríkjaher. Vélin er af gerðinni Bombardier E-11A, en slíkar vélar hafa verið notaðar til rafræns eftirlits yfir Afganistan.

Frétt af mbl.is

Þota brotlenti í Afganistan

Upphaflega var greint frá því að vélin væri í eigu ríkisflugfélagsins Ariana, en forstjóri félagsins staðfesti fljótlega í kjölfarið að engin vél frá fyrirtækinu hefði hrapað.

• Blogga um frétt