Alls hafa 717 látist úr kórónuveirunni og hafa nú fleiri látist af völdum hennar en SARS-faraldursins sem herjaði á Kína og Hong Kong á árunum 2002 til 2003. Alls létust 650 manns vegna SARS-veirunnar á því ári sem hún gekk yfir, en hún var af sama stofni og kórónuveiran. AFP-fréttastofan greinir frá.
Heilbrigðisyfirvöld í Kína tilkynntu í dag um 81 dauðsfall í Hubei-héraði, þar sem veiran á upptök sín, og um 2.841 nýtt smit. Það þýðir að yfir 34 þúsund hafa smitast af veirunni í Kína.
Kínverjum hefur ekki gengið sem skyldi að hefta útbreiðslu veirunnar þrátt fyrir að um 56 milljónir séu nú lokaðar inni í einangrun í borgum í Hubei-héraði og víðar. Í þessum borgum mega íbúar varla yfirgefa heimili sín nema ströngum skilyrðum háð.