Bandaríski leikarinn Jussie Smollett hefur verið ákærður af saksóknara í Ilinois fyrir að hafa logið að lögreglu. Ákæran er í sex liðum.
Smollett, sem lék í þáttaröðinni Empire, varð fyrir árás í byrjun síðasta árs, sem virtist vera vegna kynþáttar og kynhneigðar hans. Hann var síðar handtekinn fyrir að hafa skipulagt árásina. Hann hefur alltaf neitað sök.
Í janúar í fyrra greindi lögreglan í Chicago frá því að hún væri að rannsaka árás á Smollett og svo virtist sem tveir grímuklæddir menn hefðu ráðist á hann vegna litarháttar og kynhneigðar leikarans. Hann hafi verið sleginn í andlitið, óþekktu efni hellt yfir hann og reipi sett um háls hans.