Tyrknesk yfirvöld hafa fyrirskipað handtökur hundraða einstaklinga, sem sagðir eru hafa tengsl við valdaránstilraunina í Tyrklandi árið 2016. Frá þessu greinir Anadolu-fréttaveitan í Tyrklandi.

Tugir þúsunda manna hafa verið handteknir á þeim rúmu þremur árum sem liðin eru frá því að valdaránstilraunin var gerð en tyrknesk stjórnvöld hafa kennt klerknum Fethullah Gulen, sem er búsettur í Bandaríkjunum, um að hafa staðið á bak við valdaránstilraunina. Því hefur hann alltaf neitað.

Hann á sér þó fjölda stuðningsmanna í tyrknesku samfélagi og hafa þeir kerfisbundið sætt handtökum frá því valdaránstilraunin var gerð.

Nýjustu handtökuskipanir tyrkneskra saksóknara ná til um það bil 700 manns, en saksóknarar í Ankara fara fram á að 467 verði handteknir í 67 borgum og bæjum landsins vegna meintrar hagræðingar úrslita í inngönguprófum lögreglunnar.

Þá fara saksóknarar í Ízmír fram á að 157 manns innan sjó- og flughers landsins verði handteknir vegna tengsla við Gulen-hreyfinguna.

Samkvæmt frétt Anadolu er svo einnig farið fram á að 71 einstaklingur innan dómskerfisins í alls 15 borgum verði handtekinn, vegna meintra tengsla við Gulen.

Dómshúsið í Istanbúl. AFP

Tengdar fréttir

Tyrkland

Tyrkir vilji hleypa nýju pólitísku andrúmslofti inn

• Átök í Tyrklandi á kjördag
• Erdogan ýjar að starfslokum sínum
• Myndskeið: Erdogan syngur fyrir aðdáendur
• Staðfestir sigur Erdogans

» Fleiri tengdar fréttir

• Blogga um frétt