Alls hafa fjórir gestir á hótelinu Costa Adeje Palace-hótelinu á Tenerife greinst smitaðir af kórónuveirunni COVID-19. Tvö smit til viðbótar hafa verið staðfest til viðbótar við ítalska lækninn sem smitaðist fyrst og eiginkonu hans. Sjö Íslendingar eru á meðal þeirra þúsund gesta sem eru í sóttkví á hótelinu.
Þetta kemur fram í spænska dagblaðinu El Pais og Canarian Weekly.
Fólkið hefur verið flutt á einangrun á sjúkrahús. Fólkið er allt ítalskt en og þau sem voru greind núna höfðu varið tíma með ítalska lækninum og konu hans á Tenerife. Læknirinn hefur dvalið á eyjunni í um viku tíma en hann leitaði til læknis þegar hann fann fyrir einkennum veirunnar.
Af þeim þúsund manns sem eru í sóttkví á hótelinu eru um 800 gestir og 200 starfsmenn hótelsins. Lögreglan stendur vörð um hótelið.
Öll ný smit kórónuveirunnar í Evrópu undanfarna daga er hægt að rekja til Ítalíu. Þar hafa yfir 300 smitast og 11 látist. Aftur á móti fækkar dauðsföllum í Kína en síðasta sólarhringinn hafa 52 látist eða alls 2.715 frá því faraldurinn braust út í kringum áramótin.
Í gær var greint frá því að kórónuveiran væri komin til Austurríkis, Króatíu og Sviss. Eins til Alsír. Í öllum tilvikum er smitið rakið til Ítalíu. Fyrsta tilfelli kórónuveirunnar í Rómönsku-Ameríku var greint í gær en það var Brasilíubúi sem var nýkominn frá Ítalíu.