Á annan tug Norðmanna sitja nú í einangrun vegna gruns um kórónuveirusmit á grundvelli áfangastaða þeirra á ferðalögum nýverið en fyrsta staðfesta smittilfellið í Noregi kom upp í gær þegar kona frá Tromsø greindist með veiruna.
Einn er í einangrun í Mo i Rana, bæ í Nordland-fylki, vegna ferðalags um áhættusvæði og er að sögn yfirlæknis sveitarfélagsins beðið eftir niðurstöðum sýnatöku. Þá situr par í einangrun í Ósló eftir að hafa verið á ferðalagi í Mílanó á Ítalíu og fundið til sjúkdómseinkenna eftir heimkomu til Noregs.
Í Sauda í Rogaland situr heimilisfólk tveggja heimila innandyra í einangrun og í Elverum, sem nú tilheyrir nýju fylki, Innlandet, áður Buskerud og Oppland, eru fimm manns í einangrun á meðan beðið er niðurstöðu sýnatöku.
Bent Høie heilbrigðisráðherra segir norska ríkisútvarpinu NRK að ekkert af þessu komi á óvart, norsk stjórnvöld hafi búið sig undir það síðustu vikur að sjúkdómstilfelli taki að skjóta upp kollinum í Noregi og nú, þegar smitið breiði svo úr sér utan Kína sem raun ber vitni, megi gera ráð fyrir mun fleiri tilfellum á norskri grund.
Spurn eftir andlitsgrímum í Noregi hefur verið sem aldrei fyrr síðustu vikur og er nú svo komið að slíkur varningur er uppseldur í öllum apótekum landsins og kvað svo rammt að eftirspurn að framleiðendur slíkra gríma í Kína höfðu samband við norska heildsala fyrr í mánuðinum og föluðust eftir að kaupa grímur til baka, sem þegar höfðu verið sendar til Noregs. Daufheyrðust heildsalar við þeirri ósk.
Enn er hægt að kaupa andlitsgrímur í vefverslunum sumra apóteka og greinir norska dagblaðið VG frá því að 2.500 slíkar hafi selst á hálfum þriðja tíma í gærkvöldi. „Við upplifum gríðarlega eftirspurn dags daglega og eins og staðan er núna eigum við engar grímur,“ segir Tonje Kinn, upplýsingafulltrúi lyfjadreifingaraðilans Norsk Medisinaldepot. Hún segir fleiri grímur koma til landsins í dag og fari þær beint út til þeirra apóteka sem hafi lagt inn pantanir.
Þá bárust fréttir af því í gærkvöldi að ríkisolíufyrirtækið Equinor, áður Statoil, hefði látið þau boð út ganga að allt starfsfólk sem verið hefði við störf eða í fríi á Ítalíu, í Kína, Íran og Suður-Kóreu nýverið ætti ekki að mæta til vinnu heldur halda sig heima við í 14 daga frá heimkomu.