Greta hvetur fólk til að hætta mótmælum

Loftslagsaðgerðasinninn sænski, Greta Thunberg, hefur hvatt fólk til að hætta að safnast saman til loftslagsmótmæla á föstudögum. Ástæðan er útbreiðsla kórónuveirunnar, en fjölmörg ríki hafa sett bann við fjöldasamkomum til að hefta útbreiðslu hennar. Loftslagsmótmæli Gretu hafa verið haldin á Mynttorginu í miðborg Stokkhólms hvern föstudag frá haustinu 2018, en þau hafa síðan breiðst út um allan heim. 

„Nú biðja sérfræðingar okkur um að forðast fjöldafundi til að eiga betri möguleika á að hemja útbreiðslu kórónaveirunnar, og ég mæli með að við fylgjum leiðbeiningum þeirra. Sérstaklega á hættusvæðum,“ skrifar Thunberg á Instagram.

„Við sem erum ung verðum fyrir minnstum áhrifum af veirunni en það er mikilvægt að við sýnum samstöðu með þeim sem eru viðkvæmastir og bregðumst við með hagsmuni samfélagsins í huga.“

Þess í stað hvetur hún fólk til að taka þátt í stafrænum mótmælum og hlaða upp myndum af sér á samfélagsmiðlum undir myllumerkinu #ClimateStrikeOnline (Loftslagsverkfall á netinu).

Frétt Aftonbladet

• Blogga um frétt