Örfáar sálir og einn og einn rauður strætó, auk nokkurra bíla, sáust á götum Lundúna í dag. Í dag er fyrsti heili dagurinn sem útgöngubann gildir í Bretlandi og verður það í gildi næstu þrjár vikurnar eða fram til 13. apríl.
Boris Johnson forsætisráðherra Bretlands tilkynnti bannið í gær en það er sett til að reyna að hefta útbreiðslu kórónuveirunnar í landinu.
Eins og sjá má á meðfylgjandi myndskeiði var ansi tómlegt um að litast í borginni í dag. Fleiri en tveir mega ekki koma saman á meðan útgöngubannið gildir og verslunum sem ekki selja lífsnauðsynlegan varning hefur verið lokað.
Almenningsgarðar verða áfram opnir en Johnson varaði fólk við að hópast þangað, líkt og margir gerðu í góðu veðri um helgina: „Ef þið fylgið ekki reglunum geta lögregluþjónar sektað ykkur,“ sagði Johnson.
335 hafa látið lífið af völdum kórónuveirunnar í Bretlandi.