Loka Moskvu í viku
Setja bókamerki
Borgarstjóri Moskvu hefur ákveðið að láta aðgerðir Vladimírs Pútín Rússlandsforseta ganga enn lengra í borginni, en þar skal loka öllum kaffihúsum, verslunum, görðum og annarri ónauðsynlegri þjónustu í viku frá og með laugardegi.
Pútín tilkynnti í gær um að allir dagar í næstu viku yrðu almennir frídagar svo að flestum vinnustöðum yrði lokað auk þess sem skólahald félli niður.
Sergei Sobyanin, borgarstjóri Moskvu, hefur nú tilkynnt að gengið verði enn lengra í borginni, en hann hafði áður fyrirskipað Rússum yfir 65 ára aldri að halda sig heima. Borgarstjórinn tekur það sérstaklega fram að borgarbúar ættu þó ekki að líta á þetta sem frí, heldur alvöru aðgerðir til að sporna við útbreiðslu kórónuveirunnar.
Sobyanin segir aðgerðirnar fordæmalausar en algjörlega nauðsynlegar. Tilkynnt var um tvö dauðsföll vegna COVID-19 í Moskvu í gær, en þau eru þau fyrstu sem tilkynnt hefur verið um í landinu öllu. Samkvæmt opinberum tölum hafa 840 tilfelli kórónuveirunnar greinst á landsvísu í Rússlandi.
Veiting hvalveiðileyfis ekki brot á EES-samningi
„Á réttri leið en nokkuð í land ennþá“
Hernaðaraðstoð samþykkt – Vopnasendingar í vikunni
„Hvílir mikil leynd yfir þessu öllu“
Skar höfuðleðrið af íslenskri konu