Ítalskur starfsmaður Vatíkansins, sem býr í sama húsnæði og Frans páfi, er sagður vera sýktur af kórónuveirunni.
Samkvæmt frétt AFP-fréttastofunnar hafa nokkrir mismunandi ítalskir fjölmiðlar áreiðanlegar heimildir fyrir þessu. Í umfjöllunum ítölsku miðlanna segir að presturinn hafi búið í gestahúsi Saint Martha's í áraraðir, þar sem páfinn hefur haft aðsetur sitt í lítilli þakíbúð síðan hann var valinn 2013.
Frans páfi hefur að mestu haldið sig innandyra á heimili sínu síðan hann fékk kvefpest í lok febrúar, en þar tekur hann þó á móti einstaka gesti auk þess sem hann hefur ávarpað kaþólikka heimsins í beinni útsendingu frá bókasafni Vatíkansins.
Presturinn sem sýktur er af kórónuveirunni hefur samkvæmt heimildum tveggja ítalskra fjölmiðla verið fluttur á sjúkrahús í Róm og unnið er að því að sótthreinsa svæðið þar sem hann býr.