Yfirmenn þriggja alþjóðastofnana vara við hættunni á matarskorti ef yfirvöldum tekst ekki að takast á við kórónuveiruna og afleiðingar hennar á réttan hátt.
Ríkisstjórnir víða um heim hafa fyrirskipað þegnum sínum að halda sig heima sem hefur haft þær afleiðingar að mjög hefur hægt á heimsviðskiptum sem og matarframleiðslu. Á sama tíma hefur fólk hamstrað vörur og þannig ýtt undir alvarlega stöðu í ýmsum ríkjum þar sem hillur matvöruverslana eru tómar.
„Óvissa um framboð á matvælum getur leitt til útflutningshamlana og þannig skapað skort á alþjóðamörkuðum,“ segir í sameiginlegri yfirlýsingu Qu Dongyu, framkvæmdastjóra Matvælastofnunar Sameinuðu þjóðanna (FAO), Tedros Adhanom Ghebreyesus, framkvæmdastjóra Alþjóðaheilbrigðisstofnunarinnar (WHO) og Roberto Azevedo, framkvæmdastjóra Alþjóðaviðskiptastofnunarinnar (WTO).
Allt verði að gera til þess að tryggja frjáls viðskipti eins og mögulegt er á þessum tímum COVID-19 segja þeir ennfremur.
„Þegar gripið er til aðgerða til að verja heilsu og velferð borgara verða ríkin að tryggja það að aðgerðir tengdar viðskiptum hafi ekki truflandi áhrif á fæðuframleiðslukeðjuna.“
Þeir segja að verja þurfi starfsmenn í matvælaframleiðslu, vinnslu og dreifingu. Bæði heilsu þeirra vegna og annarra. „Á tímum sem þessum er alþjóðlegt samstarf mikilvægara en nokkru sinni áður.“