Ákveðið hefur verið að notast ekki við lyfið Chloroquine við meðferð þeirra sem sýkst hafa af kórónuveirunni í Gautaborg og Vestur-Gautlandi, eftir að í ljós komu alvarlegar aukaverkanir. Þegar höfðu þá nokkrir veikir einstaklingar fengið lyfið, sem jafnan er notað við malaríu.
Athygli hefur áður verið vakin á virkni lyfsins gegn COVID-19-sjúkdómnum sem veiran veldur. Sjúklingar sem leggjast inn á Landspítalann til meðferðar fá þannig bæði malaríulyf og sýklalyf sem saman eiga meðal annars að draga úr lífvænleika veirunnar í lungnafrumum.
50 þúsund pakkar á leið til Íslands
Már Kristjánsson, yfirlæknir á smitsjúkdómadeild Landspítalans, sagði svo í samtali við mbl.is 21. mars:
„Það eru gögn sem styðja það. Malaríulyf sem er kallað Chloroquine og afleiða af því sem er kallað Hydroxychloroquine eða Plaquenil og sýklalyf sem er kallað Zitromax. Við erum að nota þetta saman á sjúklinga sem leggjast inn vegna COVID-19-veikinda.“
Fimmtíu þúsund pakkar af lyfinu eru aukinheldur væntanlegir til Íslands um helgina, í boði lyfjafyrirtækisins Alvogens, en pakkana keypti það á Indlandi. Á lyfið að duga til meðferðar 25 þúsund sjúklinga hér á landi.
Í Gautaborg hefur reynslan þó verið á hinn bóginn — svo virðist sem chloroquine geti þvert á móti haft slæmar afleiðingar fyrir þá sjúklinga sem lyfið er gefið.
„Þess vegna höfum við í Gautaborg og Vestur-Gautlandi ákveðið að notast ekki við lyfið,“ segir Magnus Gisslén, prófessor og yfirlæknir smitsjúkdómadeildar Östra-sjúkrahússins í Gautaborg, í samtali við sænska ríkissjónvarpið en viðtalið birtist í gær á vef þess.
Héldu að lyfið væri tiltölulega skaðlaust
Lyfið Plaquenil inniheldur afleiðu af Chloroquine, svonefnt Hydroxychloroquine.
AFP
Bent er þar á að hafi menn leitað logandi ljósi að lyfi sem þegar sé til og geti virkað gegn þeirri bólgu sem COVID-19 getur valdið í lungum fólks.
Sænska lyfjaráðið hafi þegar leyft til bráðabirgða notkun lyfsins Remdesivir, sem yfirleitt er notað við ebólu. Læknar og vísindamenn erlendis hafi sömuleiðis lofað virkni lyfsins Chloroquine.
„Við vissum að það hafði þegar verið notað í Kína og á Ítalíu, og svo byrjuðum við að nota það líka. Við héldum að þetta væri tiltölulega skaðlaust lyf með fáeinar aukaverkanir,“ segir Gisslén.
Eftir að fregnir fóru í kjölfarið að berast af alvarlegum aukaverkunum lyfsins var ákveðið að hætta notkun lyfsins.
„Við getum ekki útilokað að alvarlegar aukaverkanir geti átt sér stað og jafnvel að batahorfurnar kunni að skerðast við notkun lyfsins. Þess vegna höfum við í Gautaborg, og í Vestur-Gautlandi, ákveðið að nota það ekki.“
Hann bætir þó við að ákvörðunin kunni að vera endurskoðuð komi á sjónarsviðið ný gögn sem sýni fram á annað.
Setja bókamerki
Hyggjast leyfa fólki að skoða gosið
Segjast ekki vera á kaldri slóð
Gerir ráð fyrir 150 samningum í næstu viku
Ísraelar hefna árásarinnar
Mun fara sparlega með málskotsréttinn
Ofsóttur innan veggja Boeing