Tveimur stúlkubörnum, þrigga og fjögurra ára, var nauðgað í Sómalíu í vikunni sem leið og hefur málið vakið hörð viðbrögð meðal þjóðarinnar. Ríkisstjórn landsins hefur fordæmt ódæðið.
BBC hefur eftir lækni sem starfar á sjúkrahúsinu þar sem þær eru til meðferðar að báðar þurfi á viðamiklum skurðaðgerðum að halda eftir ódæðið.
Foreldrar stúlknanna segja að frænkurnar hafi verið að ganga heim úr skólanum í Afgoye, sem er skammt frá höfuðborginni, Mogadishu. Þeim var rænt af mönnum sem fóru með þær og nauðguðu þeim og skildu eftir . Það var ekki fyrr en daginn eftir sem foreldrar þeirra fundu þær eftir að hafa leitað fullir örvæntingar að dætrum sínum þegar þær skiluðu sér ekki heim.
Ritstjóri BBC í Afríku, Will Ross, segir á vef BBC að sú staðreynd að börnum sem aðeins eru þriggja og fjögurra ára gömul skuli vera nauðgað hafi valdið gríðarlegu áfalli meðal fólks í landinu. Slíkir glæpir hafi alltaf verið framdir en nú sé farið að greina frá því opinberlega og að fólk vonist til þess að það verði til þess að hlutirnir breytist.