Fjórða daginn í röð fækkaði dauðsföllum á Spáni af völdum kórónuveirunnar en 637 létust þar síðasta sólarhringinn.
Alls eru 13.055 látnir á Spáni og skipar landið annað sætið á eftir Ítalíu á lista yfir fjölda látinna af völdum COVID-19.
Ekki hafa jafn fáir látist af völdum veirunnar á Spáni síðan 24. mars.
Madríd hefur orðið verst úti vegna veirunnar en þar hafa 29 prósent allra smita komið upp og 4.941 látist.
Forsætisráðherra landsins, Pedro Sanchez, tók um helgina ákvörðun um að framlengja strangt útgöngubann til 25. apríl en upphaflega átti það að gilda fram í miðjan mánuðinn.