Vladimír Pútín Rússlandsforseti óskar Boris Johnson, forsætisráðherra Bretlands, góðs bata og segir að bjartsýni hans og skopskyn muni hjálpa honum að jafna sig eftir að hafa smitast af kórónuveirunni.
„Ég sendi þér innilegar stuðningskveðjur á þessari erfiðu stundu hjá þér,“ sagði Pútín í skilaboðum sem hann sendi Johnson, sem liggur á gjörgæslu. „Ég er viss um að orkan sem þú býrð yfir, bjartsýnin og skopskynið munu hjálpa þér að sigrast á sjúkdómnum.“
Boris Johnson dvaldi í nótt á gjörgæsludeild á sjúkrahúsi í London eftir að einkenni hans vegna kórónuveirusýkingar versnuðu í gær. Talsmaður Downingstrætis sagði að þangað hefði Johnson verið fluttur að ráðleggingum lækna og hann hlyti fyrsta flokks hjúkrun.