Yfir 1.800 dauðsföll í Bandaríkjunum síðasta sólarhring
Setja bókamerki
Yfir 1.800 dauðsföll af völdum kórónuveirunnar voru tilkynnt í Bandaríkjunum í gær og hafa aldrei verið fleiri á einum sólarhring. Hæsta talan til þessa var 1.344 sem tilkynnt var síðustu helgi.
Nær 13 þúsund hafa látið lífið af völdum COVID-19 í Bandaríkjunum frá því að veiran hóf að breiðast út þar í landi síðari hluta janúarmánaðar. Fyrstu fimm þúsundin létust á þrjátíu dögum en næstu tæp átta þúsund á einungis sex dögum.
Þá nálgast staðfest tilfelli í Bandaríkjunum 400 þúsund og smitin á heimsvísu eru orðin 1,4 milljónir en hvergi fleiri en í Bandaríkjunum.
Donald Trump Bandaríkjaforseti segir samt sem áður að Bandaríkin séu að nálgast hápunkt faraldursins.
731 lét lífið undanfarinn sólarhring í New York sem er hæsta dánartala af völdum veirunnar í ríkinu til þessa. Um talsvert áfall er að ræða eftir tvo daga í röð þar sem tölur höfðu lækkað. Andrew Cuomo ríkisstjóri hefur þó reynt að efla trú fólks og sagt að ýmislegt bendi til að nú sé toppur kúrfunnar á svæðinu í nánd.
Staðfest smit í ríkinu eru nú orðin fleiri en staðfest smit á Ítalíu, þar sem faraldurinn hefur geisað hvað verst í Evrópu. 135.586 hafa greinst á Ítalíu en 138.836 í New York. Dauðsföllin eru þó fleiri á Ítalíu en í New York, eða 17.127 samanborið við 5.489.
Aukin tíðni þungunarrofa hjá yngsta aldurshópnum
Kveðst tala af virðingu: „Ég er enginn dóni“
„Tíminn er runninn út fyrir Kristján Loftsson“
Segir óábyrgt að skipta út öllu bankaráðinu
Mikil skjálftavirkni á landinu áhyggjuefni
Hafa samþykkt kaup fyrir um 9,2 milljarða
„Þögnin er ærandi“