„Á þessum tveimur, þremur mánuðum sem kórónuveirufaraldurinn hefur knésett flestar þjóðir er býflugan sú eina sem hefur haldið áfram störfum. Hún er sigurvegarinn sem stendur eftir,“ segir albanskur býflugnabóndi við AFP í myndskeiðinu að ofan.
Þar er sagt frá því að aldrei hafi býflugnarækt og hunangsframleiðsla staðið traustari fótum í landinu en nú. Annar býflugnabóndi en sá sem tekur til máls að ofan segist aldrei hafa séð annað eins á þeirri hálfu öld sem hann hefur verið að störfum.
Býflugurnar eru lausar við skordýraeitur sem notað er í aðra framleiðslu, þar sem hún er fallin niður. Af sömu sökum er mengunin minni og kyrrðin, sem sögð er hjálpa þeim að athafna sig í ró og næði.