Flugvellir á Grikklandi opna að nýju í Aþenu og Þessaloníku 15. júní. Komur frá 29 ríkjum verða heimilaðar á flugvöllunum. Ísland er ekki þar á meðal.
16 Evrópuríki eru á listanum, þar á meðal Þýskaland, Austurríki, Danmörk, Finnland, Tékkland, Eystrasaltsríkin, Kýpur og Malta. Evrópuríki sem hafa farið illa út úr kórónuveirufaraldrinum, svo sem Frakkland, Spánn, Bretland og Ítalía, eru ekki á listanum.
Ríkjum utan Evrópusambandsins sem verður heimilt að fljúga til landsins eru Noregur, Sviss og nágrannaríki frá Balkanskaganum, auk Ástralíu, Japan, Ísrael, Líbanon, Kína, Nýja-Sjáland og Suður-Kórea.
Frá því faraldurinn hóf að breiðast út í Grikklandi í mars hefur flugumferð verið takmörkuð en þeir sem koma til landsins hafa þurft að fara í tveggja vikna sóttkví. Önnur ríki geta bæst á listann frá 1. júlí, að því er segir í tilkynningu ferðamálaráðuneytis Grikklands.
2.906 hafa greinst með veiruna í Grikklandi og 175 látið lífið.