Erlent | mbl | 15.6.2020 | 18:55 | Uppfært 19:32

Opnun Danmerkur „að breytast í farsa“

Fólk nýtur lífsins á Íslandsbryggju í Kaupmannahöfn. Svæðinu hefur verið skipt upp í litla reiti og má aðeins tiltekinn fjöldi fólks vera á hverjum þeirra. AFP

Opnun landamæra Danmerkur er við það að breytast í farsa. Þetta segir Lasse Skou Andersen, blaðamaður danska blaðsins Information í leiðara blaðsins, sem birtist á föstudag. Danska þingið takist á um smáatriði og pólitík ráði för frekar en vísindin.

Frétt af mbl.is

Pólitísk ákvörðun að loka landamærum

„Eftir að hafa skipt um skoðun með nemendur, hótelgistingar og ferðir maka var þingið kallað saman á fimmtudag til ráðagerða um hvort brúðkaupsveislur á skemmtistöðum, veitingastaðir og hótel skyldu fá leyfi til að hafa opið fram yfir miðnætti,“ segir í leiðaranum. Nákvæm útlisting á mestu smáatriðum um líf borgaranna sé ekki viðeigandi.

Mette Frederiksen, forsætisráðherra Danmerkur, á blaðamannafundi í Kristjánsborgarhöll í Kaupmannahöfn. AFP

Umræðurnar í þinginu séu lýsandi fyrir það grundvallarvandamál sem opnunin afhjúpar. Frelsi, sem áður var tekið sem gefnu, sé nú fagnað sem miklum sigri. Tilviljanir ráði ákvarðanatökuferlinu og hver sérstaka undanþágan á fætur annarri skapi skrifræðisfrumskóg.

Landamæri Danmerkur voru opnuð fyrir ferðamönnum frá Íslandi, Noregi og Þýskalandi í dag. Upphaflega stóð til að ekki mætti gista í Kaupmannahöfn, en vikið hefur verið frá þeirri reglu vegna harðlegrar gagnrýni danskrar ferðaþjónustu og borgaryfirvalda í Kaupmannahöfn.

Frank Jensen, borgarstjóri Kaupmannahafnar, fagnaði ákvörðuninni á Twitter. Hann fékk þó ekki allar sínar óskir uppfylltar, því enn verður gerð krafa um að ferðamenn sem koma til landsins sýni fram á að þeir hyggist dvelja í landinu í minnst sex daga.