Donald Trump Bandaríkjaforseti hyggst halda kosningafund utandyra í New Hampshire um næstu helgi. Fyrri kosningafundur forsetans fór ekki sem skyldi, en dræm mæting var á fundinn.
Kosningafundurinn verður haldinn 11. júlí. Gestum verður boðið upp á sótthreinsi og andlitsgrímur eftir því sem fram kemur í tilkynningu frá kosningastjórn forsetans.
Trump sækist eftir endurkjöri í forsetakosningum sem fram eiga að fara í nóvember. Hann hélt fyrsta kosningafund framboðsins 20. júní í Tulsa Oklahoma.
Talsvert færri voru á fundinum en búist var við. Trump fullyrti fyrir fundinn að nærri milljón manns hefðu sóst eftir miðum á fundinn, en ekki voru nema 7.000 gestir í höllinni sem tekur alls 19.000 manns í sæti.