Ein kona er látin og önnur er alvarlega særð eftir hnífstunguárásir í Sarpsborg í Noregi. Þriðja konan var stungin í handlegginn og er með minni áverka. Árásarmaðurinn var handtekinn í húsnæði í miðborginni en ein kvennanna bar kennsl á manninn.
Í frétt Aftenposten kemur fram að maðurinn hafi áður komist í kast við lögin en enn séu ekki öll málsatvik ljós. Aftenposten vísar í frétt Sarpsborg Arbeiderblad þar sem haft er eftir eiginmanni einnar konunnar að árásarmaðurinn hafi bankað á dyr á heimili þeirra og komið inn. Hann hafi síðan ráðist á eiginkonu mannsins. „Við sátum og vorum að horfa á sjónvarpið þegar bankað var á dyr. Þegar ég opnaði reyndi hann að stinga mig en ég komst undan,“ hefur blaðið eftir manninum. Hann segir að síðan hafi árásarmaðurinn farið inn og stungið eiginkonu hans í handlegginn.
Á vef norska ríkisútvarpsins kemur fram að fyrsta tilkynning um árásirnar í borginni hafi borist um miðnætti en þar hafði kona verið stungin með hníf á umferðarmiðstöð í miðborginni. Stuttu síðar bárust tilkynningar um tvær aðrar árásir, aðra í St. Nikolas götu og hina í Oscars götu.
#Sarpsborg. Meldinger om flere personer som er knivstukket flere steder i Sarpsborg. Folk bes holde seg inne. Politiet kommer tilbake med mer.
— Politiet i Øst (@politietost) July 14, 2020
Politiet har pågrepet 1 person. Pr nå uvisst om det er flere involvert. Vi ber om at folk fremdeles holder seg innendørs i Sarpsborg-området.
— Politiet i Øst (@politietost) July 14, 2020
#Sarpsborg: politiet funnet en mannsperson i 40 årene som hadde tatt seg inn på en adresse i Kulåsgata. Anmeldes for skadeverk og bortvist fra stedet.
— Politiet i Øst (@politietost) July 14, 2020
Þegar fyrsta tilkynningin barst sendi lögreglan fjölmennt vopnað lögreglulið á vettvang og gaf út tilkynningu á Twitter um að fólk héldi sig innandyra í borginni.
Samkvæmt upplýsingum frá lögreglu er hún fullviss um að sá sem er í haldi sé árásarmaðurinn og að hann hafi verið einn að verki. Í öryggisskyni er mikill viðbúnaður enn hjá lögreglu og víða lögreglumenn á ferli í borginni.
Sarpsborg er um 70 km suður af Ósló en þar búa um 55 þúsund manns.