Tvær norskar farþegavélar eru nú á leið heim frá Spáni til Gardermoen-flugvallarins við Ósló með farþega sína og er ljóst að þar munu mínútur skipta sköpum um það hvort farþegar þeirra muni hefja dvöl sína á fósturjörðinni í tíu daga sóttkví eður ei.
Vél SAS er á leið frá Alicante með áætlaðan lendingartíma á Gardermoen klukkan 23:54 að norskum tíma og önnur vél, frá Norwegian, er í loftinu frá Málaga og á að lenda klukkan 23:42. Sá tími sem gildir varðandi sóttkví farþeganna er þegar hjólbarðar vélanna kyssa malbikið á Gardermoen og ljóst að nú má fátt út af bera.
Mæðgurnar Anne-Lise Rolland og Maria Mellem sitja um borð í vél Norwegian. Þær áttu í raun flug heim á þriðjudaginn í næstu viku en keyptu sér nýja flugmiða til að freista þess að komast heim áður en nýju ferðareglurnar, sem norsk stjórnvöld kynntu formlega í dag, taka gildi en samkvæmt þeim verða Spánn og Andorra rauð svæði á nýjan leik vegna fjölgunar kórónuveirutilfella þar eins og mbl.is greindi frá í dag.
Rolland, móðirin í tvíeykinu, segir að ferðin hafi verið á dagskrá síðan í janúar. Þegar heimsbyggðin gekk úr skaftinu næstu mánuði á eftir hafi þær ákveðið að fresta förinni en snúist hugur þegar norsk stjórnvöld gáfu grænt ljós á fjölda Evrópulanda fyrr í sumar, þar á meðal Spán. Rolland á sumarhús í Casares Costa sem að hennar sögn þarf að dytta að sem var öðrum þræði tilgangur fararinnar.
Síðasta vikan hafi hins vegar farið að mestu leyti í að skipuleggja heimförina eftir að norsk stjórnvöld sendu út forviðvörun á laugardaginn um að Spánn færi líklega á rauða listann á ný. Það tókst með naumindum og sitja þær mæðgur nú í síðustu vélinni sem mögulegt er að nái til Noregs áður en hurð skellur. Niðri í farangursrýminu lúrir hundur þeirra mæðgna, Lucas, í búri sínu, fullkomlega ómeðvitaður um hvað eigendur hans gætu átt yfir höfði sér.
„Þau [starfsfólk Norwegian] halda að við náum fyrir miðnætti. Nú er bara að krossleggja fingurna,“ sagði Rolland í myndsímtali við norska ríkisútvarpið NRK rétt fyrir flugtak frá Málaga fyrr í kvöld.
Tonje Sund, einn upplýsingafulltrúa SAS í Noregi, segir NRK að horfurnar séu góðar á að SAS-vélin lendi á Gardermoen fyrir miðnætti. Spili þar meðal annars inn í að flugumferð sé mun minni nú, en þegar allt er í eðlilegu horfi, og vélin geti því flogið beinni leið en ella á styttri tíma.
Tekur hún þó fram að brugðið geti til beggja vona og flugfélagið tefli aldrei öryggi farþega í tvísýnu í skiptum fyrir skemmri flugtíma.
John Eckhoff upplýsingafulltrúi, einnig hjá SAS, sagði við dagblaðið VG snemma í kvöld að vélin hefði verið á áætlun þegar hún flaug frá Gardermoen til Alicante klukkan 15:50 í dag. Hún hefði komið til Alicante klukkan 19:15 og átt að fljúga þaðan klukkan 20:25. „Við erum með það í athugun hvort við fáum aðra flugleið yfir Evrópu sem sparar okkur tíma,“ sagði Eckhoff við VG en ekki er ljóst hvort úr varð.