Hátt settir repúblikanar hafa alfarið hafnað þeirri hugmynd Donald Trump Bandaríkjaforseta að fresta forsetakosningunum í Bandaríkjunum sem eiga að fara fram í nóvember. Trump heldur því fram að utankjörfundaratkvæði muni leiða til umfangsmikils kosningasvindls en það á ekki við rök að styðjast.
Mitch McConnell, leiðtogi repúblikana í öldungadeild Bandaríkjaþings, og Kevin McCarthy, leiðtogi repúblikana í fulltrúadeild Bandaríkjaþings, hafa báðir vísað hugmyndinni á bug. BBC greinir frá.
Bandaríkjaforseti hefur ekki vald til að fresta forsetakosningunum þar sem um þær gilda alríkislög og því þyrfti þingið að koma sér saman um slíka frestun.
Mörg ríki í Bandaríkjunum vilja auka möguleika íbúa á að kjósa utan kjörfundar en Trump hefur ítrekað haldið því fram að það sé ávísun á kosningasvindl án þess þó að leggja fram sannanir máli sínu til stuðnings. Hann vill því fresta kosningum þangað til fólki sé óhætt að safnast saman á kjörstöðum með tilliti til kórónuveirunnar.
Trump hefur gengið illa í skoðanakönnunum undanfarið en þar hefur demókratinn Joe Biden haft töluvert forskot á hann.