Minnst sex eru látin af völdum hitabeltisstormsins Isaias sem nú geisar á norðausturströnd Bandaríkjanna og nálgast Kanada.
Stormurinn skall á í gærkvöldi og hefur valdið miklu tjóni og eru milljónir manna án rafmagns, meðal annars í New York.
Tvö létust þegar hvirfilbylur þeytti húsbíl þeirra, kona lést þegar flóð hrifsaði bíl hennar og þrír hafa látist vegna trjáa sem stormurinn hefur fellt.