Þúsundir Líbana mótmæltu ríkisstjórn landsins í dag, en reiði meðal borgara hefur farið vaxandi síðan á þriðjudag þegar að minnsta kosti 158 létust í gríðarmiklum sprengingum.
Til átaka hefur komið á milli lögreglu og mótmælenda og hefur lögregla beitt táragasi.
Fleiri þúsund tonn af ammóníumnítrati, sem hafði verið gert upptækt en aldrei fjarlægt, ollu sprengingunum.
Fram kemur á BBC að traust íbúa Líbanons í garð yfirvalda hafi lengi verið lítið, en í október var stjórnvöldum mótmælt í fleiri daga vegna efnahagskreppu og fallins gjaldmiðils.
Boðað hefur verið til mótmælagöngu í kvöld, bæði til að mótmæla yfirvöldum en sömuleiðis til að minnast þeirra sem hafa látist í kjölfar sprengingarinnar.