Sérstakur dómstóll á vegum Sameinuðu þjóðanna hefur sakfellt einn af fjórum mönnum sem var ákærður fyrir morðið á Rafik Hariri, fyrrverandi forsætisráðherra Líbanons, árið 2005.
Réttað hefur verið í máli mannanna að þeim fjarstöddum frá árinu 2014. Þeir tengjast allir Hizbollah-samtökunum. Dómur var kveðinn upp yfir Salim Ayyash, að því er fram kemur á vef BBC. Á sama tíma ríkir gríðarlega mikil pólitísk krísa í heimalandinu, en dómstóllinn er með aðsetur í Haag í Hollandi.
Gríðarleg reiði braust út í Líbanon eftir morðið á Hariri fyrir 15 árum.
Ayyash var fundinn sekur um hryðjuverkasamsæri og morðið á Hariri. Einnig að hafa orðið 21 að bana og sært 226 í sjálfsvígssprengjuárás í bifreið þann 14. febrúar árið 2005.
Dómstóllinn segir að engar sannanir séu fyrir því að leiðtogar Hizbollah eða Sýrland, sem hefur stutt við bakið á samtökunum, tengist árásinni.