Alexander Lúkasjenkó, forseti Hvíta-Rússlands, flaug á þyrlu yfir svæðið þar sem tugþúsundir mótmælenda kröfðust afsagnar hans. Kallaði hann mótmælendurna „rottur“.
Í myndbandi sem forsetaembættið sendi frá sér sést Lúkasjenkó með sjálfvirkan riffil í hendi og í skotheldu vesti er þyrlan lendir við forsetabústaðinn.
„Þeir flúðu eins og rottur,“ sagði Lúkasjenkó í myndbandinu sem var tekið á meðan á þyrlufluginu stóð þegar mótmælunum hafði linnt að mestu leyti. Með forsetanum í för var sonur hans Nikolai sem er fimmtán ára.
Lúkasjenkó hefur áður fyrirskipað óeirðalögreglunni að tvístra mótmælendum í sundur en í kvöld virðist sem mótmælendurnir hafi hætt sjálfviljugir enda rigning úti. Engin átök urðu við lögregluna.
Mótmælin hófust eftir að Lúkasjenkó sagðist hafa unnið forsetakosningarnar fyrir tveimur vikum með 80 prósentum atkvæða. Stjórnarandstaðan segir að brögð hafi verið í tafli.
„Við erum bara með tvær kröfur: sanngjarnar kosningar og stöðvum ofbeldið,“ sagði Igor, einn mótmælendanna við AFP-fréttastofuna.
Stjórnvöld höfðu varað Hvít-Rússa við því að taka þátt í „ólöglegum mótmælum“ og fjölmiðlar birtu myndir sem sýndu óeirðalögregluna með skildi á leið í átt að Sjálfstæðistorginu í höfuðborginni Minsk.
Varnarmálaráðuneytið sagðist ætla að grípa inn í ef þörf krefði til verndar „heilögum“ minnisvörðum vegna síðari heimsstyrjaldarinnar. Þó nokkrum neðanjarðarlestarstöðvum í Minsk var jafnframt lokað.