Maður var skotinn til bana í Huddinge, úthverfi Stokkhólms, í gærkvöldi. Skotárásin var gerð skammt frá tveimur grunnskólum í Skogås.
Samkvæmt fréttum sænska ríkissjónvarpsins og Expressen var í fyrstu talað um að maðurinn hafi verið alvarlega særður í skotárásinni sem var gerð á ellefta tímanum í gærkvöldi. Í morgun greindi lögreglan síðan frá því að maðurinn væri látinn og búið væri að upplýsa fjölskyldu hans um andlátið. Enginn hefur verið handtekinn í tengslum við morðið en rætt við vitni og lögregla er með myndefni af vettvangi til skoðunar.
Ola Österling, upplýsingafulltrúi lögreglunnar í Stokkhólmi, segir að lögregla hafi gengið á milli húsa í nágrenninu og rætt við möguleg vitni.