Tveir létu lífið og 14 særðust í skotárás í Rochester í New York-ríki í nótt. Að sögn lögreglu var skotum hleypt af í garðpartíi og var lögreglan með mikinn viðbúnað.
Lögreglan segir að um 100 manns hafi verið á hlaupum þegar lögreglu bar að garði og mikil ringulreið ríkt á svæðinu.
Karl og kona um tvítugt létust í árásinni. Ekki hefur verið greint frá nöfnun þeirra.
Fjórtán voru síðan fluttir á sjúkrahús til aðhlynningar. Enginn þeirra er í lífshættu.
Þá segir lögreglan að enginn hafi verið handtekinn í tengslum við málið. Óljóst sé á þessari stundu hvort einn byssumaður hafi verið á ferðinni eða fleiri.