Tveggja ára barn neitaði að vera með grímu
Setja bókamerki
Konu var gert að yfirgefa flugvél American Airlines eftir að tveggja ára sonur hennar neitaði að vera með andlitsgrímu.
„Ég reyndi hvað eftir annað, ég grátbað hann, mútaði honum, ræddi við hann, gerði allt sem ég gat á sama tíma og hann öskraði og grét þegar ég reyndi að halda honum og setja grímuna á hann, á sama tíma og mér leið eins og ömurlegri móður,“ skrifaði Rachel Davis á Instagram.
Hún var í vinnuferð á Flórída þegar fellibylurinn Sally fór að láta að sér kveða.
„Við reyndum að koma okkur í burtu fyrr en þau aflýstu fluginu,“ sagði Davis við ABC News. „Auga stormsins gekk yfir okkur á miðvikudagsmorgun og rafmagnið fór af þar sem við dvöldum.“
„Kuldalegt og grimmilegt“
Hún sagðist hafa verið dauðþreytt þegar mæðginin komust loksins um borð í flugvél heim til Manchester í New Hampshire. Stuttu eftir að David settist niður sagði hún að flugfreyjan hefði sagt henni og „örþreyttum“ syni hennar að ef hún gæti ekki fengið hann til að nota grímu yrði hún að yfirgefa flugvélina.
Allir farþegarnir, þar á meðal Davis og sonur hennar, þurftu að yfirgefa vélina vegna atviksins.
„Þetta var mjög kuldalegt og grimmilegt,“ sagði Taylor Crounoyer, sem einnig var um borð í vélinni. „Þetta snerist ekki um að fullorðinn einstaklingur vildi ekki nota grímu vegna þess að hann væri á móti því – þetta var barn. Og þetta var heldur ekki slæm, óábyrg móðir – hún var grátandi og reyndi að fá hann til að vera með grímuna og bað flugfreyjurnar um hjálp til að finna út hvað hún ætti að gera.“
Crounoyer tók myndband við brottfararhliðið þar sem David sagði grátandi: „Ég veit ekki hvað þið viljið að ég geri til að halda grímunni á honum. Viljið þið að ég festi hana með límbandi á andlitið á honum? Hann er tveggja ára og hann skilur þetta ekki!“
Stærstu flugfélög Bandaríkjanna krefjast þess að öll börn tveggja ára og eldri noti grímur um borð í flugvélum. Þessi stefna hefur verið gagnrýnd vegna fregna um að foreldrar með lítil börn hafa verið reknir úr vélunum.
Seint í ágúst var móður með sex börn gert að yfirgefa flugvél JetBlue vegna þess að tveggja ára dóttir hennar neitaði að vera með grímu.
Íslenska ríkið dæmt brotlegt
Danir í áfalli yfir brunanum
Gleymir seint deginum sem skriðurnar féllu
Forsetafylgismenn dregnir í dilka
Børsen brennur á afmæli drottningar
Boðar 17 milljarða hagræðingu á næsta ári