Disney tilkynnti fyrr í dag að 28.000 starfsmönnum skemmtigarða fyrirtækisins í Bandaríkjunum hefur verið sagt upp störfum.
Fram kemur í frétt Washington Post að um tveir þriðju þeirra starfsmanna sem misstu vinnuna hafi verið í hlutastarfi.
„Eins erfitt og það er að taka þessa ákvörðun er það eini skynsamlegi kosturinn sem við höfum í ljósi þrálátra áhrifa COVID-19 á viðskiptin okkar, þar með talið takmarkaður fjöldi gesta vegna fjarlægðartakmarkana og áframhaldandi óvissa um lengd faraldursins,“ sagði Josh D'amaro, stjórnarformaður skemmtigarða Disney í tölvupósti til starfsmanna.
Kórónuveirufaraldurinn hefur haft umtalsverð áhrif á skemmtigarða í Bandaríkjunum. Á síðasta ársfjórðungi var velta Disney um milljarður dollara, samanborið við 7 milljarða dollara á sama tíma á síðasta ári.