Vanhelgaði grafir gyðinga í Danmörku

Danskur dómstóll hefur dæmt 39 ára karlmann sem er hliðhollur nýnasistum í eins árs fangelsi fyrir að vanhelga grafreit gyðinga í dönsku borginni Randers.

Frétt af mbl.is

„Árásir gegn dönskum gyðingum og okkur öllum“

Maðurinn og 28 ára vitorðsmaður hans voru fundnir sekir um að hafa vanhelgað grafreit og fyrir skemmdarverk. Ekki er búið að kveða upp dóm fyrir síðarnefnda brotið.

Í nóvember í fyrra, 81 ári eftir kristalnóttina svokölluðu þegar nasistar brutu allt og brömluðu í verslunum, öðrum byggingum og bænahúsum gyðinga, vanhelguðu mennirnir tveir yfir áttatíu legsteina, veltu sumum um koll og krotuðu á aðra.

AFP

Meðlimur í NMR

39 ára maðurinn, sem ekki hefur verið nafngreindur, er einn af leiðtogum danska útibús samtakanna NMR, að sögn saksóknara.

Meðlimir NMR skilgreina sig sem „byltingarsinnaða þjóðernissósíalista“. Samtökin voru stofnuð í Svíþjóð 1997 og fyrirfinnast á hinum Norðurlöndunum. Hæstiréttur Finnlands bannaði samtökin í september síðastliðnum og sagði að þau hefðu brotið lög um málfrelsi með því að „dreifa hatursfullum hugmyndum um innflytjendur, hinsegin fólk og gyðinga.“

Fjöldi lögbrota sem fól í sér gyðingaandúð jókst í Danmörku um 50 prósent frá 2017 til 2018, að sögn samfélags gyðinga í landinu á síðasta ári.

Í febrúar 2015 lést einn eftir að árás var gerð á bænahús gyðinga í Kaupmannahöfn.

• Blogga um frétt