Ráðamenn í Aserbaídsjan hafa sakað hersveitir Armena um að brjóta á nýjasta vopnahléssamningi sem þjóðirnar gerðu til að stöðva átök í Nagorno-Karabakh-héraði.
Samningurinn átti að taka gildi á miðnætti að staðartíma.
Armenar hafa sakað hersveitir Asera um það sama; brot á nýjasta vopnahléssamningnum.
Samkvæmt yfirlýsingu frá varnarmálaráðuneyti Aserbaídsjans, sem send var út snemma í morgun, brutu Armenar „gróflega“ gegn nýja samkomulaginu.
Varnarmálaráðuneyti Armena fullyrti laust eftir miðnætti að Aserar hefðu skotið flugskeytum á skotmörk í Nagorno-Karabakh og með því brotið samkomulagið.
Átök ríkjanna um Nagorno-Karabakh hafa staðið í þrjár vikur og eru þau skæðustu frá því að sex ára stríði um svæðið lauk með vopnahléi árið 1994 en hundruð hafa látist.