Yfir 50 milljónir Bandaríkjamanna hafa þegar greitt atkvæði í forsetakosningunum vestanhafs utan kjörfundar. Síðustu kappræður forsetaframbjóðendanna tveggja, Joe Biden og Donald Trump, fóru fram í Tennessee í nótt.
Á svipuðum tímapunkti fyrir forsetakosningarnar árið 2016 höfðu sex milljónir kosið utan kjörfundar. Sérfræðingar segja að aukinn fjöldi þeirra sem kjósi utan kjörfundar sé bein afleiðing kórónuveiruheimsfaraldursins en hann hefur leitt af sér að margir leiti leiða til að þurfa ekki að mæta á kjörstað á kjördag, sem er 3. nóvember.
Samkvæmt gögnum frá háskólanum í Flórída hafa 35 milljónir kjósenda póstlagt atkvæði sitt og rúmlega 15 milljónir hafa greitt atkvæði í eigin persónu utan kjörfundar.
Fréttir herma að fleiri demókratar en repúblikanar séu á kjörskrá um þessar mundir og að þeir hafi kosið í meira mæli en repúblikanar. Tölur gefa einnig til kynna að konur og svartir séu í meirihluta þeirra sem kosið hafa snemma.